نبض كفرقاسم Nabd KQ من كفرقاسم… وإليها، بكل نبضة حب وانتماء.
رسالة وصلتنا من مواطن قسماوي ننشرها كما هي –
اللي بصير في شوارع بلدنا صار استهتار غير طبيعي!
بسكليتات كهرباء وتركتورونات، وأولاد صغار بيسوقوها على الشوارع الرئيسية وبين السيارات بدون أي وعي أو مسؤولية… كأن الشارع ساحة ألعاب!
شو مستنيين؟ كارثة أكبر؟ موت أكتر؟
السواقة العشوائية، التزريق بين السيارات، الدخول المفاجئ — كل هاي التصرفات بتعرضهم وبتعرض غيرهم لخطر حقيقي. وإحنا كسائقين صرنا نخاف منهم أكثر ما نخاف على حالنا! الواحد بلفّ وببعد عشان ما يدعسهم، وممكن يعمل حادث بسببهم.
الموضوع ما عاد ينسكت عليه.
وين الأهل؟ وين الرقابة؟ كيف طفل بطلع على شارع رئيسي بوسيلة ممكن تقتله بلحظة؟
هاي مش حرية… هاي فوضى واستهتار بحياة الناس.
لازم يكون في وقفة جدية:
منع، رقابة، وتطبيق قانون — مش بس حكي.
قبل ما نخسر أرواح جديدة… اصحوا!
الشارع مش لعبة، وحياة الناس خط أحمر
