شوفيرية باصات العمومي “أفيكيم” بيمشوا بسرعة متهوّرة بالبلد وبدون نظام، وعم بيسبّبوا خطر على الناس

رسالة وصلتنا من مواطن قسماوي ننشرها كما هي –

أبو عبد الله يعطيك العافية، في نقطة مهمة بدي تهتم فيها وتنشرها قبل ما تصير كارثة بالبلد…

شوفيرية باصات العمومي “أفيكيم” بيمشوا بسرعة متهوّرة بالبلد وبدون نظام، وعم بيسبّبوا خطر على الناس، خاصة في منطقة الكانتري، وين المسطحات/المواقف (מגרשים) اللي بوقفوا فيها آخر اليوم. الدنيا بتكون ليل، ولما يروحوا بيمشوا بسرعة عالية، وهذا خطر كبير، خصوصًا إنه منطقة الكانتري وقاعة الأسيل فيها أعراس وزحمة سير.

أنا قبل يومين كنت واقف على مفرق الكانتري، ولو شوي كان الباص يفوت فيّ، وكانوا أولادي معي. من الخوف حكيت مع الشوفير، وكنت بدي أرجعله، بس وجود أولادي خلاني أختصر الموقف، عشان ما أخوّفهم أكثر. مع إنه الطريق اللي إلي لازم يحترموه، زي ما همّا بيمشوا على مهلهم في بتاح تكفا، لازم يحترموه عنا بالبلد… مش حياة غيرنا أغلى من حياتنا.

الشوفير اعتذر، بس لو – لا سمح الله – صارت كارثة وخسرت واحد من أولادي بسبب تهوّر سائق مستعجل يروح… شو بفيدني اعتذاره بعدها؟ والله كل عيلته ما بكفّوني بظفر ابني.

فأنا بطلب منك تهتم بهاي النقطة أخوي، لأنه عن جد بلاش تصير كارثة من وراهم… وشكرًا إلك.